namak...

Namak banna chahta hun…


Saaf dhula safed sa

Lehron se lipat ke aaun,

Kinaron pe Dhoop khaun

Moti na sahi lekin Moti sa chamkun,

Kuchh kar dikhana chahta hun…



Uski bhookh ka hissa ban

Sawaar rahun uski zubaan par

Hone ka pata na chale

Par na hone par sab

feeka lagey mere bina

chuchaap uske lahu mein shaamil ho

uski ragon mein daud lagaun

sar se pair tak fail jaun…nazar bhi na aaun

uske har rang mein ghul

khud ko khona chahta hun

namak banna chahta hun



uske zakhmon mein jo galti se bhar jaun

toh aasuon se bhi main hi bahar aaun

mujhe chakhe ya beh jaane de

thodi si jalan reh jaane de

ehsaas hona zaroori toh nahin

bas yun hi kabhi kabhi yaad aana chahta hun

namak banna chahta hun



mera zyada hona khale

toh mere kam hone mein bhi khala hai

na jaane kya junoon ho chala hai

sookha aur khaara

mujhe nami ki kamii hi bhali ho

apni pyaas ko zinda rakh

khud jeena chahta hun

namak banna chahta hun

baadal hai...

mujhe laga wo boondein thi mujhko bhigaane bhar ke liye


sab sametne ki koshish bhi kari

aur sab beh jaane di...

kyunki wo toh baras raha tha zamane bhar ke liye...

mera khaata...

mere khaate se kuchh kam hua jaata hai


lagta hai aajkal

hisaab toh nahin rakha

par haath phira ke dekha hai roz

apni daulat ko jiya hai

khud hi pe kharch kiya hai roz

har dafa kharchun jitna chahe

haath dugna hi aata hai

par na jaane ab kyun lagta hai

mere khaate se kuchh kam hua jaata hai



maangne bhar ki der thi

tumhare naam hi kar deti

par hamare beech mera tumhara kya

jo tumhara hai wohi toh mera hua

yehi haq toh phir ek shaq sa banaata hai

ki mere khaate se kuchh kam hua jaata hai



koi kehta hai "kya lekar aaye the jo kho doge"

tumhara kya gaya jo rote ho?

yeh geeta saar padhe sansaar

hum mayaviyon ko maya se hi pyaar

sacche dil se chaaha hai bas ek baar

toh jitna mila bahut hua

itne pe hi rehne do

yeh jo mera khaata hai....

aaj hai toh kal ka kya...

aaj toh hai par kal ka kya...


kal ka hisaab alag hai

aaj ka jawaab alag hai

aaj ke paas ek wajeh hai

har baat ki jirah hai

zidd hai adey rehne ki

kal ke raaste mein khade rehne ki

hamesha yun hi pade rehne ki

ussey yakeen nahin kal pe

raat ke ferbadal pe

bas chale toh na wo kahin jaaye,

na koi kahin se aaye

beet raha hai kahan maanta hai?

na doobtesooraj ko jaanta hai

paani mein na dikhega aks andhere mein

khud ko kahan payega kal ke savere mein?

ek saaya hai aaj

os ki boondon se dhul jayega

pata bhi na chalega kab kal mein ghul jayega

kuchh yaad rahega kuchh bhool jayega

jo meherbaan hua kal aaj par....

toh kuchh zaroor jhuk jayega,

aur shayad kisi ke liye

kal mein bhi ruk jayega

jhooth kaha tha...

Khud se jhooth kaha tha maine


Mazaak kiya tha

Sach kahun toh uss jhooth ka pal pal jiya tha

Ab bas khwabon ki maut ka ranj hai

Ummeddon ki badduaon ka darr hai

Magar jhooth ki kaunsi lambi umar hai

Yeh toh khudkushi pe aamadaa hai

Yakeen nahin hota

ki kuch der mein dum tod dega

Kis berahmi se mujhe

sach ke rehmokaram pe chhor dega

dhaage ki chooriyan...

dhaage ki chooriyan...




aadhe chaand ne pehni, toh poora gol hua,

inse aadha, kharey soney ka mol hua

maana adhoori hain, par aadhe se poori hain...

ye dhaage ki choorian



khanakti nahin, dhadakti hain...

ragon ke raaste mein atakti hain,

samjhaane se kahan maanti hain,

kehti hain, nabz pehchaanti hain...

ye dhaage ki choorian



haath aise thaame hain,

ab na chhootenge...

saans toot jayegi, dhaage na tootenge...

yun jaane na dengi, uljhaye rakhengi,

khwamkhah jee lagaaye rakhengi,

jhoothi sacchi si, ye dhaage ki choorian...

kambakht khidkian...

कमबख्त खिड़कियाँ करवाती हैं मोहब्बतें,




बादलों से, बारिशों से, तो कभी बूंदों से,



खुली रह जाएँ रात को, तो झाँका करती हैं,



रात भर चाँद को ताका करती हैं





खुद पे ओस की बूँदें चढ़ाए रखती हैं,



सच सवेरा धुन्धलाये रखती हैं



चुपचुपाते सावन के संदेसे लाती हैं



वक़्त बेवक्त हवा के झोंके, भीतर ले आती हैं



कमबख्त खिड़कियाँ...